2Ti 2 | MCQ | STEP | Ijihuna'e nuni harihe a maiji vwihanii'ina ka'ene Jesu Keriso oni vaji namujihuni vaji kisima'ura rena para'amana.

2 Timothy 2

Jesu Keriso Oni Sorutia 'Ee Huni Hura Veji'ina

1 Ijihuna'e nuni harihe a maiji vwihanii'ina ka'ene Jesu Keriso oni vaji namujihuni vaji kisima'ura rena para'amana. 2 'Ene iraka ka'ene a he'eme na eriri ea mapoka puni una'i 'waravujaho ara ea ka'ene uchaha pa'ajihi vajihe 'warave pura areri ea 'aho'a 'u'o najahe 'wara'avara. 3 Nara vea kisina apene sisei hijuja'ina'e a 'u'o areri Jesu Keriso oni sorutia mamai jihuna'e ija'ina'e hi'amana. 4 Ea irara sorutia renujaho hu kaukara 'aho'a ka'ene ea mamahapo vejujija pavenuna kaivo ea irara hu sorutia pijahume renajihuni ura ijiru venuna. 5 'Ene ea irara chacharavi'inijaho hu majikari chacharame asitahuna pana kaivo hu varapa 'ahi 'ararihai'i chacharame ea asitahe eha apenuna. 6 Ea ka'ene juara arisi 'oji'inijaho hu ea amura ka'ene huni juasi'i 'iruma mako 'ekahunijina. 7 'Ene iraka ka'ene nara 'waravujija hami 'eke piraha ki'amana. 'Ejakame Natohwijara uneunecha mapoka veje hena kama parahuna. 8 Nuni vu'a maa maiu'inijara 'waramujaho vwiha'amana. Jesu Keriso ka'ene Teviti oni amujijaho kwame 'urinana. 9 Ijihuna'e na siseisei ea sisea puna'i tipurai hiju. 'Enakaivo Godoni Irijaho tipura panamu. 10 Ijihuni hahi uneunecha mapoka ani ani'ina nuni una'i rejujija na ijihipuni vaja kajino kirane va'ura. Ijihuni maijaho ea ka'ene iji pijihajihi punijihuna'e avajura. 'Ejakame pu 'u'o roe Jesu Keriso oni vaji ni'ajihi'inijaho apene 'ee pinana ka'ene majama nahuniji 'u'o ape'avarono avajura. 11 Ikaho ira mamaa ka'ene rone 'warumujina. Ijihuna'e nú Huni vaji kwamasahara'e re'avajaho nú pu pu'úmo hihuna. 12 'Ene nú kirasahe hina va'avajaho nú pu pu'úmo ea 'ajoahuna. 'Ene nú Hu hekaja'avajaho Hu 'u'o nú hekajúhuna. 13 Vea ka'ene nú panimaa rojujaho Hu majama maiji ihajinanamuna. Ijihuni maijaho Huni kara ijí ori'ini hekajahuna areri pana.

Nimaa Veti'eju'e Veji'ina

14 Ike vu'akeja kú'o nahame Godoni una'i ira kisina 'warave pu hene ira ka'ene maa pa'ajihuna'e 'uraujija arehuna. Ijihuni maijaho ijara ijí heji'inijija ruarahiura. 15 Oni kaukara hami hami vejakame Godiho onijihuna'e teamama para'amana. Oni kaukara hami ve'irakúne niho'o pajuna'amana. 'E'eje Godoni Ira ariramaa nimaiji amairia nirisame naja'amana. 16 'Enakaivo mwe'a kehuni vu'a ka'ene maa pa'ajija juha'amana. Ijihuni maijaho ijipo aherame va'e Godi ura parenujihi ve'enakúne. 17 'Ene puni vu'ijija areri 'ajúi sakahi 'ume va'uja'ina'e va'una. Ijihipuni vajijaho Haimaneasi'o Piritasi una. 18 Ea ikija 'unama nimaijaho are'i kaivo 'unama ani va'i'i ijá 'wavu Kwamasahe 'urihunijaho nirejume paranana 'wavu. 'Ene ea 'ahopuni nimairoa ruarahe veju'e puruva retiu. 19 'Enakaivo Godira iraka ka'ene 'waramajija anesima'uri jihuna'e nija'ina'e nama va'ura. 'Ene ika'ina'e vejara Natohwijaho ea irahipo Hunijija nihena kimuna. 'Ene ea irara Natohwi jihuni ihiji 'ura'amajaho huni siseijija arema para'amana. 20 Sea ni'ima'ura vaji minikia ani ani'ina navu. 'Aho'a korutia vejare 'ee 'aho'a sirivai vejarepo nahuneru pana kaivo icha 'ee 'anatai vejara 'u'o navura. Ijija 'aho'a vea mama'ina'e rejuji vena ijura kaivo 'aho'a na'ia mapoka vena ijura. 21 Ijá ve'eje ei pini ijí huni uneunecha siseakihi ato'aru'i kaivo hu areri minikia ka'ene vea mama'inijino vena ijuja'ina'e rehuna. Iji pijahe karaa ranave Natohwi jihuni kaukara mamaiji venahuna. 22 Ea maiu'inapo hahijipo itunavuri 'unamijija juha'amana kaivo ariramaa 'ee nimairoa 'ee oja 'ekaravura 'ee matausahe hijuji 'ararihi'amana. 'Ene ea ka'ene Natohwiji oja mamaiji vwihaji'i 'uraha 'wavujihipo vejuja'ina'e ve'amana. 23 'Enakaivo vwiha pa'anepo puruva reti'eju'e majikarino vu'a 'wame vahacharavi'inijija pataarora'amana. Ani henuja'ina ijipo veju'e 'ura'aravura. 24 Natohwi jihuni pweija pa'uraaravi'ina'e rehuna kaivo ea maho'o hami 'ahie areri najahe 'ee erapo sise'i 'aha'avajaho masuani makivi'i ajuarane hihuna. 25 Ea ka'ene ninakaravi'inijija hami kivi'i ni'ajihakame Godira veje ta'arohe roe nimaijaho hena ka'avara. 26 'Ene pu 'avena sisei jihuni tivisi pinaname hine huni ura ijí venahujija nimaijara vwiha punijija jaraa kame juhame ruva'e use'avara.